عبد الرحيم منصور

طلقوني جوه الدروب وفي قلبي ندعة حليب

بين الشروق والغروب ازاي ياولد تشيب


عرفت عتبات بيوت لكن ما خطتهاش

ودقت ياما الموت والقلب برضك عاش!

أنا والطريق والناس... ماشيين نزاحم ارض

أخرتها نفس الكاس... بنشربه مع بعض!

أنا غنوة مش لاقية قلب مش عايزة في الضل أموت

خدوني كسوة ودرب شبابيك تستر بيوت!

أمي يابذرة حنان ياأصل كل البشر

في كل حتة ومكان بلاقي ليكي أثر


بافر من تحت جلدي وأهرب وألف وأدوب

الود اشرب بيدي نبع الشروق والغروب


بحلم وفي الحلم راحة بحلم في عالم غريب

بحلم ومش لاقي راحة من القريب والغريب

ياصرخة القلب كوني كوني ياصرخة شموس

واوعي ياصرخة تهوني تهون معاكي النفوس


منين أجيبك ياسمرة ياللي عيونك دوايا

حلمت ياما ببكره وبكره أصبح مسايا


الدنيا دامت لمين وكيف تدوم علي حال

مابين بكا وحنين وبين ميلاد وزوال


علي كل لون يا خلق
علي كل لون تطلعوا
سودتوا لون الحق
وكرهتوا كون ترجعوا


علي كل لون ياحياه
علي كل لون يا بشر
بشر بتخلق حياة
وبشربتقتل بشر